Мерц со јасна порака до Балканот: „Ве сакаме во ЕУ!“ – Србија мора да избере меѓу Европа, Русија и Кина

На самитот во Тиват учествуваа лидерите на 27-те земји-членки на ЕУ, како и претставници на Србија, Босна и Херцеговина, Албанија, Косово, Северна Македонија и Црна Гора.

„Јасната порака од денешниот ден е: Ве сакаме! Сакаме овие држави наскоро да станат членки на Европската Унија“, изјави Мерц по завршувањето на состанокот.

Според германскиот канцелар, ЕУ има стратешки интерес да го интегрира Западниот Балкан и затоа ќе се работи на постепено приближување на земјите кон европските институции уште пред полноправното членство.

Посебно внимание беше посветено на Србија. По разговорот со српскиот претседател Александар Вучиќ, на кој присуствувале и францускиот претседател Емануел Макрон, претседателката на Европската комисија Урсула фон дер Лајен и претседателот на Европскиот совет Антонио Кошта, Мерц испрати директна порака до Белград.

„Србија мора да одлучи каде стои. Не може да води политика на балансирање меѓу Русија, Кина и Европа. Ако иднината на Србија е Европа, тогаш и одговорот на Европа е – Србија“, нагласи Мерц.

Оваа изјава доаѓа во момент кога Брисел е сè позагрижен поради блиските односи на Белград со Москва и Пекинг. Сепак, европските лидери нагласуваат дека вратата за членство останува отворена за сите шест земји од Западен Балкан.

Самитот во Тиват се смета за еден од најважните сигнали во последните години дека процесот на проширување повторно добива силен политички импулс во Европската Унија.